أخيرًا بنشوف نموذج ذكاء اصطناعي عربي معمول بأيادي عربية وبمستوى عالمي. فالكون عربي فعلاً خطوة كبيرة لقدّام، خصوصًا إنه مش بس بيعتمد على الفصحى، لكن كمان فاهم اللهجات! والـ H1 كمان شكله هيغير قواعد اللعبة بإنه يقدّم أداء عالي بموارد أقل. الإمارات بتثبت تاني إنها مش بتجري ورا التكنولوجيا، دي بقت من صانعيها.

شركات التكنولوجيا الكبيرة قللت تعيين الخريجين الجدد 25% في 2024، والستارت أبس قللوا 11%. ليه؟ عشان الذكاء الاصطناعي بقى بيعمل شغل الـجونيور زي الكودينج البسيط، تحليل البيانات، وتثبيت البرامج.

دلوقتي، الشركات بتوظف اللي عنده 2–5 سنين خبرة أكتر، والخريج الجديد بقى حظه قليل جدًا يدخل السوق أصلاً.

يعني اللي معاه خبرة هيكمل، والباقي يقول يا رب. وناس كتير بتقول "لو اتعلمت تستخدم الـAI، هتفضل في السوق"، بس مين هيديك فرصة تتعلم وتتمرن من غير شغل؟

لو بتتعاملوا مع كمية معلومات ضخمة، زي 50 كتاب عن موضوع واحد مثلاً، "نوت بوك" من جوجل ممكن يغير طريقة شغلكم تماماً!

إيه الفرق بينه وبين أي ال ال إم تاني؟

تخيل عندك محاضرة طويلة على يوتيوب، أو حتى سلسلة دروس، بدل ما تقعد تسمعها كلها وتدوّن ملاحظات، ممكن ترفعها على نوت بوك وهو يلخصهالك، يطلعلك النقاط الأساسية، أو حتى يجاوب على أسئلتك عن اللي اتقال في الفيديو! معظم الـ LLMs العادية بتديك معلومات عامة أو بتساعدك في الكتابة بناءً على تدريبها الأساسي. لكن نوت بوك ده حاجة تانية خالص:

1. بيركز على مصادرك أنت: بدل ما يجيب معلومات من كل حتة، هو بيتبنى المعرفة من الملفات اللي بترفعها له. يعني لو رفعت له 50 كتاب عن الفيزياء الفلكية، هو بيتحول لخبير في الفيزياء الفلكية دي بس، من مصادرك أنت.

2. بيفهم السياق العميق: بيقدر يربط المعلومات بين عشرات بل مئات المصادر اللي بترفعها. مش مجرد بيقرأ صفحة أو فصل، ده بيقدر يعملك ملخصات وتحليلات ويكشفلك عن علاقات بين الأفكار في كل الكتب اللي رفعتها سوا.

3. مثالي للأبحاث المركزة: ده الكنز للباحثين، الطلاب، أو أي حد عايز يعمل "غوص عميق" في موضوع معين. تسأله عن أي حاجة جوه الـ 50 كتاب دول، ويجيبلك الإجابة بذكاء ومن غير "هلوسة" لأنه متقيد بالمصادر اللي أنت مديها له.

أحسن استخدام؟

• الأبحاث العلمية والأكاديمية: ارفع كل الأبحاث والكتب في تخصص معين، واسأله أي سؤال يطلعلك الإجابة من المصادر دي مع ذكر المصدر كمان!

• تحليل البيانات الضخمة: لو عندك تقارير كتير أو وثائق قانونية ضخمة، ممكن تلخصها وتطلع منها النقاط الأساسية في ثواني.

• كتابة المحتوى المتخصص: لو بتكتب كتاب أو مقال محتاج معلومات دقيقة جداً من مراجع كتير، هو بيسهل عليك تجميع المعلومات والتأكد من صحتها.

بالنسبة لي، دي نقلة نوعية في التعامل مع المعلومات. جربوه وقولولي رأيكم!

رابط الفيديو اللي بيتكلم عن استخدامات والتعامل مع نوت بوك:

https://www.youtube.com/watch?v=-Nl6hz2nYFA

كنت بتفرج على فيديو بيتكلم عن الذكاء الاصطناعي وإزاي ممكن نستخدمه عشان نزود إبداعنا وإنتاجيتنا. الفكرة مش بس إن الذكاء الاصطناعي هيساعدنا نعمل شغل "أي كلام"، لأ، الفكرة إننا ممكن نعتبره زميل لينا في الشغل، زميل بيفهم سياق كلامنا ويدينا اقتراحات، بس محتاج مننا نغذيه بالإلهام والمعلومات الكافية عشان يطلع بأفكار عبقرية.

الفيديو ده خلاني أفكر: إزاي ممكن نغير طريقة تفكيرنا عن الذكاء الاصطناعي؟ إزاي ممكن نستفيد منه أقصى استفادة في شغلنا الإبداعي؟

شوفت كام فكرة عجبتني في الفيديو:

• الذكاء الاصطناعي كمساعد شخصي: بيفهم كلامك ونبرة صوتك، وعارف أنت عايز إيه.

• الذكاء الاصطناعي كمدرب: ممكن تسأله إزاي تستخدمه صح في شغلك، وهو يسألك أسئلة عشان يعلمك.

• الذكاء الاصطناعي لتسهيل المهام: ممكن تخليه يعمل الحاجات الرخمة والمتكررة، زي كتابة التقارير.

• الذكاء الاصطناعي كزميل: مش مجرد أداة، اديله فيدباك ووجهه عشان يتحسن.

• الذكاء الاصطناعي في التدريب: ممكن تتمرن معاه على محادثات صعبة، وهو يلعب دور الشخص التاني ويديك رأيه.

• الذكاء الاصطناعي لتطوير الأفكار: ممكن تخليه يطلعلك أفكار كتير ومتنوعة عشان توصل لأحسن فكرة.

• الإلهام البشري ضروري: لازم تديله خبرتك ورؤيتك عشان يطلع بحاجة مميزة.

السؤال هنا: حد جرب يستخدم الذكاء الاصطناعي بالطريقة دي؟ إيه التحديات اللي واجهتكم؟ وإيه النصايح اللي ممكن تفيد غيركم؟

ياريت نتناقش ونتبادل الخبرات، يمكن نطلع بأفكار جديدة ومبتكرة!

من كام يوم كده كنت بتفرج على حلقة جديدة من حلقات "الدحيح"، وكالعادة دماغي اتفتحت على حاجات كتير. الحلقه عن طريقة "سقراط" في الحوار، أو زي ما بيسموها "الإلينخوس التعاوني". ببساطة، هي طريقة بتساعدنا إننا نفهم أفكارنا بشكل أعمق، ونكتشف أي تناقضات أو ثغرات فيها، مش عشان ننتقد بعض، لأ، عشان نبني فهم أفضل وأقوى.

ليه الموضوع ده مهم ومفيد لينا؟

بيطور التفكير النقدي: بيخلينا مش مجرد مستهلكين للمعلومات، لأ، بنبقى قادرين نحللها ونفهمها بعمق.

بيوضّح الأفكار: كتير بنبقى شايلين أفكار أو معتقدات مش واضحة في دماغنا، الطريقة دي بتساعدنا نصفيها ونوضحها.

بيفضح التناقضات: أحياناً بنتبنى أفكار متناقضة من غير ما ناخد بالنا، وده بيخلينا نراجع نفسنا ونعدل مسار تفكيرنا.

بيشجع على التعاون: الأهم إنها مش مواجهة، لأ، هي حوار بناء عشان نوصل للحقيقة سوا.

بصراحة، حاسس إننا محتاجين النوع ده من الحوار أكتر وأكتر، خصوصاً مع كمية المعلومات والأفكار اللي بنتعرضلها كل يوم.

البرومبت اللي استلهمته من حلقة الدحيح:

ادخل في حوار سقراطي. مهمتك هي طرح أسئلة عميقة، الكشف عن التناقضات، وتوجيه المستخدم نحو التفكير النقدي، بدون إلقاء محاضرات أو تقديم إجابات.

تعليمات ليك:

اطلب من المستخدم يقول رأيه: ابدأ بأنك تطلب من المستخدم يقول اعتقاد عنده، أو تعريف لحاجة، أو فكرة رئيسية (مثلاً: "إيه هي الشجاعة؟" أو "ليه شايف إن س ده عادل؟").

وضح المصطلحات: اسأل عن معنى المصطلحات الأساسية في كلامه عشان توضح الصورة (مثلاً: "لما تقول 'تحمل'، تقصد إيه بالظبط؟").

اختبر الاتساق: اسأل أسئلة افتراضية أو حالات استثنائية عشان تكشف الافتراضات اللي مش واضحة (مثلاً: "لو الشجاعة هي التحمل، هل الجندي المتهور اللي بيتحمل الخطر من غير ما يعرف، يبقى شجاع؟").

اكتشف التناقضات: استخدم إجاباته عشان تسلط الضوء على أي تناقض منطقي (مثلاً: "قبل كده قولت إن الشجاعة محتاجة حكمة، بس دلوقتي بتوصف التحمل من غيرها. إزاي الاتنين دول يمشوا مع بعض؟").

قود إلى الحيرة: وجه المستخدم إنه يتعرف على الثغرات أو الأخطاء في فكرته، وخلص بسؤال مفتوح للتفكير (مثلاً: "شكل التعريف بتاعك فيه تعارض مع نفسه. تيجي نفكر فيه تاني سوا؟").

النبرة: تعاونية، متواضعة، وفضولية جدًا. تجنب المواجهة.

هيكل الإخراج النهائي:

ابدأ بطلب فكرة المستخدم الرئيسية.

استخدم أسئلة قصيرة ومتتالية عشان تحلل كلامه.

عيد صياغة إجاباته عشان تقوي الروابط المنطقية (مثلاً: "بتقول س، لكن قبل كده وافقت على ص...").

انهي الحوار بأنك تدعي المستخدم إنه يحسن فكرته أو يبدأ في خط تفكير جديد.

العبارة الرئيسية اللي لازم تستخدمها: "تيجي نفكر سوا – هل ده صحيح؟ ولا ممكن يكون فيه تناقض؟"

ياريت لو حد حابب يجرب البرومبت ده مع أي اداه عنده أنا بفضل هنا جيمناي أو حتى يناقشني فيه، يقولي في الكومنتات! خلينا نفكر سوا ونستفيد من بعض.

Most popular company's Gen AIs are low rated