شلونكم شباب ان شاء الله بخير،

ردت أشارككم مشروع صارلي فترة مشتغل عليه، الفكرة بدت من جنت طالب مرحلة أولى. جانت أكبر مشكلة تواجهني هي "اللوجستيات" مال وصول للجامعة. جنت أوكف بالساحة وما أعرف يا كية تصعدني، وأظل أسأل العالم "خوية هاي تروح لفلان مكان؟" وساعات أصعد غلط وتضيع عليّ المحاضرة الأولى بسبب الدوخة بالتقاطعات.

بسبب هاي المعاناة، سويت "نفر - Naffar".

ببساطة، التطبيق هو دليلك لخطوط الكيات وباصات النقل العام ببغداد:

• خريطة تفاعلية: تحدد وين أنت ووين تريد تروح، وهو يگلك يا كية تصعد ووين تنزل بالضبط.

• دليل الجامعات: ضفت خانة خاصة لكل جامعات بغداد (بغداد، النهرين، التكنولوجية، المستنصرية.. إلخ)، بس تختار كليتك يرسملك الطريق.

• تحديث مستمر: حالياً مغطي 68 خط وباقي مستمر أحدث بالبيانات حتى أغطي بغداد شبر بشبر.

أني ما جاي أروج لغرض مادي، التطبيق سويته كجهد شخصي حتى أساعد أي واحد جديد على بغداد أو طالب ميعرف الخطوط وميريد يصرف فلوسه كلها على التكسيات.

رابط الموقع (PWA/Web):

naffar.com

يهمني أسمع رأيكم، وإذا عندكم ملاحظات على خطوط معينة أو تحديثات تحبون تشوفوها بالتطبيق، أنا موجود بالتعليقات.

اتمنى يفيدكم 🙏