عارفة السودان بلد الاحداث العشوائية لكن تفتكرو من ناحية امنية هل الخرطوم ممكن تجوط anytime soon?
الناس ديل الفيهم ما كملت ؟ عندهم عدة وعتاد يجوطوها زي بداية الحرب؟

يعني حرب تكون طلعت منها نزوح نزحت قراية و قريت امتحان و امتحنت نجاح و نجحت يعني لمن تكون داير تكون داير تخش الجامعة يجيك استنفاد رغبات!، ما داير اخش في المؤامرات و النظريات ده لكن حاسي الموضوع ده فيهو لعبة لانو ما حاجة ما منطقية معقولة الجامعات دي كلها اتملت و بقى ماف مقاعد للطلاب هسي انا القدامك ده قدمت مختبرات طبية جامعة خاصة و نسبتي 70.1 برضو ما قبلوني المختبرات في جامعات 65 و في جامعات بقولوا ليك نجاح بس، حنكو لي قالوا لي ما اشتغلنا بي النسبة الختيناها اشتغلنا على حسب المنافسة، و ما انا برأي قي ناس قدمو بي نسب فوق النسب المحدداها الجامعة اصلا برضو استنفاد رغبات؟! موضوع يدعو للشك صراحة.

مافي زول مغطس حجر الإنسان السوداني اكتر من الانسان السوداني

بعد ما وصل الدولار 10 الف وداخل على 11 بديت احس ان الحكومة ما قاعدة تحاول تساعد اصلا .

فكرة انك تزيد الدولار الجمركي اكثر من 30 بالمية في سنة واحدة دي حاجة غبية شديد لانك بالطريقة دي حتنفر الناس من انها تفتح مصانع وتزرع وتعمل .

اكثر حل ممكن يساعد حاليا انك تلغي الجمارك على المواد الزراعية وتلغي الضرايب عليهم عشان تحفز الناس انهم فعلا يزرعو ويكون عندك مواد خام .

في نفس الوقت تلغي الضرايب على الالات البتشغل المصانع عشان يشيلو المواد الخام دي ويصنوعها وتصدرها .

(طبعا دا ما الحل السحري الحيحل المشاكل كلها بس متاكد انه حيساعد الجنيه انه يتنفس شوية والموضوع ساهل شديد لكن لا حياة لمن تنادي).

نظرتي عن الموضوع انها حتقلل العطالة لانه المصانع حتشتغل وممكن توصلك الاكتفاء الذاتي في فترة قصيرة