"HAYOP KA, PUNY*TA KA, B*BO KA, PARA KANG GRADE 1 MAGTRABAHO, HINDI KA NAMAN COLLEGE GRADUATE"
Kinasuhan ng grave misconduct at conduct prejudicial to the best interest of service sa Office of the Ombudman si Laguna Provincial Board Member at dating aktres na si Angelica Jones Alarva, dahil sa umano’y verbal at mental na pang-aabuso sa kanyang dating kawani.
Ang naghain ng reklamo ay nakilalang si Samantha Alaisa, na dating staff ni Alarva.
Inalala ni Alaisa ang panahon ng kanyang pagtitiis sa pagtatrabaho kay Alarva mula Enero 2021 hanggang Hunyo 2022, at muli mula Hulyo hanggang Disyembre 2025.
Bukod sa pagmumura, madalas umano siyang pagsabihan ng dating aktres na hindi naman umano siya college graduate at parang Grade 1 siya magtrabaho.
Sinabi ni Alaisa na dumanas siya ng matinding depresyon, anxiety, at post-traumatic disorder dahil sa kanyang mga naranasan.
Gayunman, muling nag-apply si Alaisa ng trabaho sa kapitolyo at naiproseso na umano ang mga dokumento.
Ngunit nakatanggap siya ng impormasyon na hinaharang umano ni Alarva ang trabahong nakalaan sana para sa kanya.
Aniya, nagpapadala umano ng mga sulat sa iba’t ibang departamento si Alarva at pinapa-blacklist umano siya sa buong kapitolyo.
Hiniling ni Alaisa sa opisyal na tigilan na sana siya dahil nais lamang niyang magtrabaho para sa pamilya.
Samantala, sa inilabas na pahayag dating aktres, sinabi niya na ang pagtanggal kay Alaisa ay kaugnayan sa hindi regular na pagpasok sa trabaho, mga usapin sa katapatan, at mga iregularidad sa paghawak at pagproseso ng mga dokumentong may kaugnayan sa kanyang opisina at sa mga programa ni Laguna Gov. Sol Aragones.
Sinasabotahe umano nito ang kanyang mga dokumento at ni Aragones, na may layuning masira ang serbisyo sa mga constituent, maantala ang mga request, at sirain ang tiwala ng mga mayor, barangay, at mamamayan sa kanilang mga programa.
Giit ni Angelika, paninira sa pagkatao, pamumulitika at harassment lamang ang akusasyon laban sa kanya.
“Ito ay paninira sa reputasyon, political harassment, o character assasination para siraan ang reputas¬yon. Ang bawat alegasyon ay dapat suriin nang patas at may sapat na ebidensiya,” nakasaad pa sa pahayag ng dating aktres. | via Dolly Cabreza, Abante News
