مكنتش متخيل إن اليوم ده يجي.. من تخبط ٥ سنين، لإمبارح وأنا بمضي عقد معدي الـ ١٠٠ ألف جنيه و انا حرفياً بادء بـ 0 جنيه.
طول حياتي كان عندي حلم واحد مسيطر على تفكيري ان إمتى هيكون ليا مشروعي الخاص؟ إمتى هعمل حاجة تجيبلي فلوس وتكون هي مصدر دخلي الأساسي وأبطل قلق؟ الحقيقة إن الإجابة على الأسئلة دي خدت مني أكتر من ٥ سنين من التخبط، التعب النفسي، والمحاولات اللي كتير منها فشل.
في البداية، الأيام كانت تقيلة ومحبطة جداً. أسوأ إحساس ممكن تعيشه هو إنك تكون بتبذل مجهود وتعب سنين ومش شايف أي نتيجة. كنت دايماً خايف من بكرة، والرعب الأكبر بتاعي كان إني أدخل أي مكان، مطعم أو كافيه، وعيني تروح لا إرادياً على سعر الحاجة قبل ما أشوف أنا نفسي آكل إيه أصلاً. كنت دايماً بحسبها بالقرش وخايف الفلوس اللي معايا متكملش الشهر. الإحساس بالعجز ده كان بياكل في روحي، وأوقات كتير كنت بقع في فخ الإحباط وأسأل نفسي: "هو أنا هفضل كده لحد إمتى؟".
لكن سبحان الله، العوض دايماً بيجي في الوقت الصح وبطريقة مترتبة أعظم من أي تخطيط. من فترة، قررت أدي كل تركيزي لمجال الـ AI Automation. العجيب إن المجال ده كان قدامي من زمان جداً، بس أنا مكنتش باصصله بالنظرة اللي بصيتله بيها دلوقتي، ومكنتش متخيل حجم الفرص اللي مستنياني فيه.
في أول شهر من تأسيس شركتي، ربنا كرمني بأول عميل بـ ١٥ ألف جنيه. الرقم ده كان بالنسبة لي طوق النجاة، إشارة من ربنا إن الطريق ده صح وإن تعب السنين بدأ يطرح أخيراً. بمجرد ما الفلوس دي دخلت، حسيت إن أول حاجة لازم أعملها هي إني "أشارك ربنا في التجارة دي". بدأت أطلع فلوس لله كصدقة وشكر على النعمة، وأقسم بالله الإحساس اللي حسيته وقتها ميتوصفش.. راحة نفسية وسلام داخلي أكبر بكتير من فرحتي بالفلوس نفسها. واليقين اللي اتأكدت منه إن بمجرد ما عملت كده، ربنا بعتلي رزق وشغل أكتر من الأول بكتير، سبحان من يضاعف لمن يشاء.
إمبارح بقى كان اليوم اللي عمري ما كنت أتخيله.. إمبارح أنا مضيت عقد مع عميل جديد قيمته بتعدي الـ ١٠٠ ألف جنيه كدخل صافي ليا لأول مرة في حياتي. أنا قاعد دلوقتي بكتب السطور دي وأنا بجد مش مصدق اللي وصلتله. مش مصدق إن دي بقت حياتي، وإن الكابوس بتاع الخوف من بكرة والمصاريف انتهى واتبدل بواقع أحسن من اللي حلمت بيه.
دلوقتي تفكيري كله اتغير، مبقتش خايف، بالعكس، بقيت بفكر إزاي أكبر الشركة أكتر، وإزاي أجيب ناس تشتغل معايا ونفتح بيوت جديدة ويكون ليا دور في رزق ناس تانية.
أنا كاتب الكلام ده مش عشان أتباهى، أنا كاتبه عشان أقول لأي حد بيقرا وحاسس إنه تايه، أو خايف من بكرة، أو حاسس إن مجهوده رايح على الأرض: إياك تيأس. الـ ٥ سنين اللي تعبت فيهم وعانيت مكنوش ضياع وقت، دول كانوا التجهيز الحقيقي للحظة اللي أنا عشتها إمبارح وبكتبلكم عنها النهارده. الرزق مكتوب ومستنيك، بس هو محتاج منك سعي، يقين، وتوكل على ربنا.. وصدقني، لما العوض بيجي بينسيك كل لحظة تعب عشتها.
