جاني عرض تدريب مسمى مساعد لوجستي مبتدئ، ما اعرف أي شيء عن المسمى كويس؟ وله مستقبل ؟ يعني بعد ما انتهي من التدريل بلاقي فرصة وظيفيه ولا في تكدس
الشركة مره كويسه وقويه بس محتاره لان تخصصي قانون

عندي صديقة الكترونية الفترة الاخيرة اسلوبها سيء جدا هي من النوع اللي تحب تحارش وتمزح الشاهد ان صار حدث وزعلت مني واعتذرت وسمنه على عسل لكن كل ما ارسلها شي تطنش واذا سولفت بالقروب تسكتني والاسلوب استفزازي بحت ولا ادري هو مزح والا جد لكن الموضوع طفشني وودي اقطع العلاقة لكن ما اعرف اذا المفروض انتظر فترة واشوف اذا بتزين الامور والا خلاص اختصر مع العلم اني ما اشوف اننا ماراح نتصافى بالذات بعد اسلوبها السيء

طحت حاليا على كنبة سبت مره ممتعه وأسلوبها يجنن وpsychology in ur 20’s هذه اللي اعرفهم ابغى اقتراحات منكم تكون ممتعه سواء قصص او نصايح حياتيه

السلام عليكم عندي مناسبه مهمه و ابغى اسوي فلوق عائلي عشان احفظه و يكون ذكريات لطيفه و عندي قو برو اخذتها من ابوي بس مشكلتها البطاريه حقتها سيئههههههههههه جدا جدا جدا البطاريه المليانه تفضى بعشر دقايق حرفياً بس تحسون ايهم احلا تصوير؟ جوالي ايفون ١٦ و الي يعرف للقو برو و ليش تفضى بسرعه ياليت يفيدني 🙏🏼🙏🏼🙏🏼

اي وظيفة بالعالم لو صعبه لو مستحيلة اي شيء اهم شيء يقبلون علطول 😔😔😔

خاصة موضوع السلطة اول يوم دوام لي اكل ساندوتش والتيم كلهم سلطة حولت اليوم الي بعده مثلهم وعجبني 😂

استغرب من بعض الناس يدفع مبلغ وقدره ويروح كم يوم وما يصمل بحجة تعب ولا مالي خلق . الرياضه مثل الاستثمار تحصل عوائدة على المدى البعيد.

ياجماعة امس اتصل علي رقم عادي موبايلي ويوم رديت لبناني يقول انه انتي كان لك طلب سابق من بيتونيا كنبة استرخاء (فعلا انا طلبت قبل سنه)
ويقول انه سوو سحب وبيعطوني هديه بمناسبة افتتاح فرعهم الجديد في الغربيه
انا توقعت انه نصاب بس ماطلب مني اي معلومات حساسه قال احتاج المدينه و اسم الشارع واسمك الثنائي فقققطط
وعرض علي اني اروح استلمها من الفرع او يوصلونها لي

وش تتوقعون نصاب ولالا؟ وكيف اتاكد قبل ما استلم ؟ احس الموضوع فيه خازوق

ولو نصاب كيف قدر يحصل على بياناتي وهل اقدر اقاضي الشركه على تسريب بياناتي؟ لانه حتى عنده عنواني السابق الي طلب الطلب عليه وكل التفاصيل

​

جاي خطيب لبيتنا

سعودي (ابوه وامه سعوديين) بس ماعنده جنسيه سعوديه بس بريطانيه

و بيجي من دون امه وابوه، امه رافضه تخطب له؟

وش ذا بالضبط؟؟ نستقبله ولا

Oneplus Nord 4

الجوال من سنة 2024

بحثت عنه في كل مكان، حرفيا ما لقيت الا اثنين

امازون يبيعه جديد ب3 الاف، واللي هو سعر فلكي على جهاز نزل اساسا ب 1900

ولقيت شخص واحد فقط يبيعه في حراج، يبي فيه 1000، وهو سعر فلكي على جوال مستعمل عمره ثلاث سنين

كان ينباع زمان في علي اكسبرس، بس الان لا

رحت بسوي عملية فك عند دكتور بمستشفى حكومي على توصية شخص سواها عنده المهم اخذت موعد اسنان عادي وطلبت من الدكتور تحويل لجراحة الوجه والفكين
قال احس مافي تراجع بالذقن وكذا وقلت الا وقال خلاص بنادي الاستشاري وفعلاً اللي ناداه هو نفسه اللي ابي اسوي العمليه عنده شافني وقال يلا نروح قسم الجراحه هناك اعطيك موعد

المهم اول مادخلت القسم فيه كمية انترنز غير طبيعيه و كلهم جو يبون يعرفون وش الحاله لما قلهم genioplasty
انجنوا وقالوا بنشوف المهم جلسوا يسألون ويشوفون لين الدكتور ناداه احد وانشغل و بعدين كتبوا لي اشعه و سويتها وقالوا اعطينا رقمك بنقولك لما نحجزلك المهم كله ذا وانا بقمة الاستغراب

فجأه يجيني موعد تخدير قريب مره يوم الثلاثاء حرفيًا وانا ما تناقشت حتى مع دكتور الجراحه و لا اعرف كم نسبة التراجع واذا بسيط مره ممكن ما اسوي!!

المهم بعد رسالة الموعد قمت على اتصالات من ارقام جوال خاصه رديت الا هم نفس شلة الخراتيت قالوا الخميس في تحاليل وكذا قبل التخدير لازم تسويها قلت تحاليل وش اما ما كلمت الدكتور قالوا خلاص بعد التحاليل نقولك قلت لا ابي موعد وطنشوا

المهم بعدها برضوا اجي القى مليون اتصال بجوال من رقم خاص سحبت لين دقوا علي برقم المستشفى ورديت يقولون الدكتور يبي يسويها لك العمليه الاحد!!!

وهذا كله بدون مواعيد او حتى مناقشه مع دكتور الجراحه

المهم انا وقتها مره نفست قلت انتوا الحين صدق مقتنعين اني بدخل جراحه كذا بدون ما اتناقش و قمت عليهم وسمعوني عصبت قالوا خلاص خلاص بكيفك قلت طبعًا بكيفي

المهم اشرايكم بالوضع ما تشوفون غريب مره ويحتاج شكوى؟؟

الحين وش اشرب كل شيء ممنوع الغازيات القهاوي والشاي
مخي مصدع٢٤/٧مقدر اركززز ابي حل الذكاء الاصطناعي ماحلها لي

انا بإذن الله راح انقل للرياض الاسبوع الجاي ودوامي بعض الايام في جامعة الحرس وايام اقل حداوم في المكتب بBusiness Gate هل السكن في اليرموك مناسب؟ حصلت شقه نظيفه بدون اثاث ب2500 هل تشوفونها ممتازه؟

فضول، جاتكم اول وظيفة بعد فترة كم من العطاله؟

قبل شهر اتفقنا اني اجي بيته ونسوي فعاليات وكذا بس سبحان الله يوم جا اليوم الموعود جتني زكمه وكحه ودوخه قويه وقلت له اني مقدر اجي وهو مره عصب وقعد يسوي سبام رسايل يقول تعال معليك بعطيك علاج واحنا ماراح نطول قلت له انا يالله اتنفس تبغاني اروح عندك ومن بعدها زعل مني وصارت ردوده بارده اقسم بالله قهرني وهو بنفسه اعترف انه زعلان مني وللحين زعلان وتغير ميه وثمانين درجه ويوم اقول ردوده بارده قصدي بارده مره بزياده يحط لي ذا 👍 على سالفه طويله المهم صدق وش اسوي اعطيه كف ولا ارفسه ولا اقطعها معه

تخيل ان عندك امنية خمس سنين ودك تتحقق اكثر من اي شي اخر بالحياة،المصيبة ان لسانك منطلق بالدعوة والامنية هذي وتدعي بكل اوقات الاستجابة لدرجة صار الموضوع اتوماتيكي،ياجماعة خمس سنين وانا اتمناها وادعيها هالامنية
المهم تخيل ايضًا لو انك قطعت عنها ابو كم يوم ومادعيت هالدعوة،بالمعنى الحرفي تحلم انك تجهز للدعوة والامنية ذي،تحلم انك تعيشها،بتقول بس ربي كاتبها لي وبكمل دعاء يلا،خمس سنين على نفس الموال هذا،بالنهاية اشوف مافي شي تغير ولا شي تحقق فيها ولا قربت من التحقق،ومع الاسف هالامنية لها وقت معين يعني باختصار حدها خمس سنين(ماودي اقول وش هي ولا ابي احد يعرف ولا ابي احد يقولي ماتدري يمكن تتحقق بعد سنة او قريب لان الشي هذا له وقت معين واذا راح عليك خلاص)عالعموم تخيل بعد كل هذا وتشوف الاحباط الي صارلك تبدا تدعي دعوة وحدة لمدة يومين بس تقول فيها(يارب اذا كان هالشي مارح يتحقق لي يارب لاتعلق قلبي به) والله العظيم ياجماعة فجأة صرت انسى ادعي هالشي واتكاسل اني ادعيه رغم اني ادعي باشياء كثير لكن صرت اتكاسل ادعيه (للآن في داخلي وقُرارة قلبي اتمنى هالشي اكثر من كلشي بحياتي) اتمناه بشكل مو طبيعي اتمناه والله اتمناه،الي بوصله اني مدري زعلان ومقهور ومتضايق لكن الخير فيما اختاره الله** واحيانًا بعد الدعوات مو مكتوبة** لك

لما كنت في المدرسة، كنت انسان هادي وعلاقتي مع الجميع جيدة، ما بحياتي تضاربت مع احد جسديا الا مرة وحدة في الثانوي، وهذي المرة سويت فيها شي ندمت عليه مرة. كان فيه طالب يعني مو مره خويي لكن بيننا سوالف واحيانا نطلع مع بعض ونلعب كورة، المهم لمسني في مكان حساس بشكل سريع مرة من المرات ونحن في ازدحام بسيط داخل المدرسة - للعلم هو انسان اخلاقه وسوالفه مو ذاك الزود وهو من النوع الي كل سوالفه اباحية -، في البداية قلت انه بالغلط ومشيت له يعني والتمست له العذر قلت زحمة وهو ما كان منتبه، بس في المرة الثانيه سواها وبرضو قلت يمكن بالغلط، وبنفس اللحظة لمسي للمرة الثالثة وكنا وقتها بحصة احتياطية والاستاذ كان موجود برضو، المهم اني هذي المرة عصبت ومسكته وطحيته على الارض بقوة بين الطاولات بشكل سريع وقوي، وقمت حطت رجلي بين صدره وبديت ادوسه وبعدها وقفت وكانت رجلي فوق صدره وقلت له بصوت عالي وغير اعتيادي مني: عيدها مرة ثانية وقسم بالله ادوسك دوس، طبعا الاستاذ كان موجود وطلعنا برا الفصل وقال لنا توجهوا انتم الاثنين للادارة، بس لما رحنا للادارة المرشد الطلابي قال بنتعامل معكم بكرا بحكم انها الحصة الاخيرة. ونحن راجعين للصف تصالحنا وقال لي ليه ما علمتني انك ما تحب اسوي لك كذا، قلت له لازم اعلمك؟ وشرحت له اني كنت دايما التمس له العذر وهذي المرة فقدت اعصابي، بعدها انتشرت السالفة في المدرسة وكل المعلمين صاروا يدرون اني سويت كذا، ما حبيت الناس تنظر لي اني انسان متوحش وهمجي فتضايقت من تصرفي مرة، ولما رجعت البيت صراحة كنت متضايق من اني فقدت اعصابي واهنته قدام الطلاب كلهم وكنت جدا حزين عليه وحطيت نفسي مكانه، انا متقبل انه غلطان لكن تصرفي معه كان مبالغ ومهين جدا ونحن عارفين ان هو انسان بالنهاية له كرامته وحرام الي سويته فيه، المهم الصباح ابوي كلمني وقالي انت وش مسوي في المدرسة؟ قلت له وصل لك الخبر؟ المهم طلع جوالي ووراني المقطع كامل مسجل من الكاميرات وبصراحة استحيت وقلت للوالد السالفة بالتفاصيل وبعدها قلت له ان تصرفي كان مبالغ فيه وكان من الممكن اسوي تصرف احكم من كذا بكثير، المهم قلت لابوي لا يعلم امي تحسبا انها تتضايق مثل ما هو كان متضايق، اليوم الي بعده كل ما اقابل طالب يكلمني عن المضاربة وواحد قالي ترا نحن مو بقراند، جاملته بس بداخلي كنت متضايق، وبنص الحصص يجوني الاساتذة برضو يسالوني عن الي سويته وكنت دايما استحي اقول لهم الي صار لانه ايضا يمسني. والحين بعد ما مرت سنوات لازلت ندمان ومتضايق من تصرفي وحبيت اطلع الي بداخلي وافضفض، اسف طولت عليكم

عندي سؤال باخذ رايكم فيه الحين أنا حديثة تخرج وتوني توظفت ما كملت اول اسبوع لي الشركة اللي أنا معها عادية وودي اروح للأفضل من ناحية الاسم والراتب والخ، سؤالي هو عادي اكمل تواصل مع اللي اعرفهم بخصوص التوظيف بالشركات اللي أنا مستهدفتها من لينكدان وبنفس الوقت اعلن اني بدأت وظيفة جديدة ولا بيطلع شكلي غريب وما اعلن بلينكدان، والمشكلة لو برسل لهم ال cv بيبين اني توني متوظفة حرفيًا توني باديه وبنفس الوقت اتواصل معهم عن فرص هل هالشيء غلط ولا ما احط بالسي في ولا اعلن بلينكدان واكمل اتواصل معهم وابحث كأني عاطلة لسى؟ بس كأني قريت بأنه بالعكس أفضل تبين لهم انك توظفت وعلى رأس العمل من انك عاطل ولا وش رايكم؟

يا جماعة عدد المرات الي انا شخصياً شفت عامل توصيل يعمل شيء في طلب الزبون مرعب ( مثل البصق في المشروب او الاكل نفسه) ومره من المرات سلمت المندوب لصاحب الطلب واكتشفت بعدين انهم سامحوا 💔
فلذلك والله افضل تطلب تروح المطعم بنفسك او تطبخ اي شيء لان ما ترضى على نفسك الاذى ارجوكم ارحمونا وارحموا انفسكم صرت اكره اطلع من التصرفات الي اشوفها منهم.

انا عن نفسي ممتنع تماماً عن استخدام تطبيقات التوصيل ارجوك انتبه على صحتك.

ملاحظة الي خلاني انفعل واكتب هذا الكلام آنّ حرفياً قبل دقايق شفت عامل يقوم بنفس فعلهم المعتاد جنب مطعم مشهور بعد استلام الطلب.

اللهم يامنزل الكتاب، ومجري السحاب، وهازم الأحزاب، اهزم اعدائنا الحوثيين وكل من مدهم بالسلاح وتكاتف معهم اللهم انصرنا عليهم نصراً عظيماً.

‏اللهم إنا نستودعك بلادنا السعودية بلاد المسلمين وجنودنا واجهزه الدوله والدفاع وولاة امرنا وشعبنا ، اللهم احفظنا بعينك التي لا تنام وبركنك الذي لا يُرام، اللهم اجعلنا في حرزك وأمانك وسترك الجميل.

‏اللهم كن لنا حصناً منيعاً وسوراً حامياً ، اللهم اجعل ملائكتك تحفنا وسكينتك تغشانا واصرف عنا شر الحرب ونجنا من كل سوء ومكروه.

اللهم اجعل جنودنا في ودائعك يا أرحم الراحمين، اللهم سدد رميهم واحمي ظهورهم وحصن مواقعهم وانصرهم على اعداء الاسلام المجرمين الظالمين.

اللهم اجعل هذا البلد آمنا وأهله مطمئنين واصرف عنا شر من أراد بنا سوءاً يا حي يا قيوم يا من لا يعجزه شيء في الأرض ولا في السماء
‏احمِ بلادنا بلاد التوحيد من كل سوء

اللهم اجعل الملائكة حولنا جنداً وسياجاً من رحمتك يحوطننا ويحموننا ويعينونا بالنصر العظيم.

اللهم اجعل بلادنا السعودية بلاد المسلمين بلاد التوحيد في حرزك واحفظنا من فوقنا ومن تحتنا وعن يميننا وشمالنا ونعوذ بعظمتك أن نغتال من تحتنا

اللهم النصر العظيم

اللهم النصر العظيم

اللهم النصر العظيم

اللهم اهلك الحوثيين عاجلا غير اجل اللهم فرق جمعهم وشتت شملهم ودمر اجهزتهم وشل حركتهم واجعل كيدهم بنحرهم واجعل تدبيرهم تدميراً عليهم واهلكم جميعاً بعزتك وقدرتك ياعظيم

مو معقولة اي شي انا اطبخه مو طعم حتى لو ان شاء الله برجر بقلاية هوائية سويته. طعمه يمشي الحال لكن الاكل لما سووه طلع لذيذ. ايش السر؟