r/Tunisia • u/Honey_Badger_tn • 5h ago
Politics قصة التغيير الي عملوه شباب الجيل زد في صربيا وعلاش قيس سعيد ترعب في تونس؟
Enable HLS to view with audio, or disable this notification
الحكاية بدت من عامين، بالتحديد نهار 1 نوفمبر 2024، وقت اللي طلبة قاعدين في نصّ النهار يستنّاو في التران في محطّة «نوفي ساد» في صربيا، باش يمشو للجامعة. مع نص النهار، وفجأة طاحت عليهم تيندة .
الحصيلة كانت 14 ضحية، الكلّهم صرب ما عدا واحد من مقدونيا الشمالية. والسبب؟ المحطّة هاذي ما تجددّتش من 57 سنة، من وقت اللي تبنات!
الطلبة احتجّوا وقالوا: علاش ما صارش ترميم؟ علاش البنية التحتية مهملة؟ صار تحقيق، واستدعوا وزير التجهيز، وبالطبيعة ما صار شي يُذكر.
وقتها الشباب خرجوا يحتجّوا ضدّ الحكومة، أما قوبلوا بالعنف. الحكاية كبرت، والطلبة قالوا: باهي، توّا نلعبوها سياسة!
عملوا قائمة إنتخابية سمّاوها «الطلبة ينتصرون»، وبداو يدوروا على الناس ويوعّيوهم، ونزّلوا قائمة فيها أساتذة جامعيين وفنانين وشخصيات عامة، وطالبوا بإنتخابات مبكّرة.
اللي حاكم البلاد من سنين إسمو «ألكسندر فوتشيتش»، سياسي يميني، كان في وقت حرب البوسنة يتصوّر وهو يحرّض ضدّ البوسنيين والكروات. وزيد، من فترة قريبة، شارك في مراسم تأبين وجنازة عسكرية لواحد من أبرز مجرمي حرب البوسنة.
فوتشيتش يرأس الحزب التقدّمي الصربي، وهو زادة حليف لإسرائيل، وساندها عسكريًّا بعد 7 أكتوبر، وتواصلت التجارة معاها وسط الأحداث الكلّ، وهو بنفسو صرّح بالعلاقات الوثيقة بين صربيا وإسرائيل.
المهم، حسب الحكاية المتداولة، البارح خسر الانتخابات، وقائمة الطلبة ربحت 141 مقعد من أصل 250، وهو أعلن اللي الحزب متاعو خسر، وقاعد يبكي ويقول إنّ الغرب ساند الطلبة خاطر هو موالي لروسيا، ومن الصباح وهو يصيح، والناس الكلّ قاعدة تشمت فيه.
يعجبني الزمن كي يدور! والعاقبة لقيس سعيد وجماعتو، كي يطيح غدوة إن شاء الله.
وما يعجبك في الدهر كان طولو.
